Шинэхэн аав нарт...

Том гэдэстэй жирэмсэн эмэгтэйчүүд ямар эгдүүтэй харагддаг болохыг та мэдэх үү. Жирэмсэн эмэгтэй хүнийг хүн болгон өхөөрддөг. Харин ангир үрээ хэвлийдээ тээж яваа түүний эрүүл мэнд хамгаас чухал байдаг. Эхийн хэвлийд байгаа үрийн эрүүл мэнд эхээс шууд хамааралтай байдаг гэхэд хилсдэхгүй. Тиймээс маш хянамгай байх хэрэгтэй. Харин амаржсаны дараа гэртээ гарч ирэх нь гэр бүлийн амьдралд хамгийн дурсамжтай мөчүүдийн нэг байдаг. Энэ үед эр нөхөр нь л хамаг зүйлийг бэлтгэх хэрэгтэй.

Хүүхдэд хэрэгтэй бүх л зүйлийг бэлтгэх хэрэгтэй. Ямартай ч шинэ аав танд хэлэх хэдэн зөвлөмж байна. -Төрсний дараа эхийн бие ядруухан байдаг учраас өөрийн ажлаа зохицуулж хамт байх нь зөв. -Энэ үед олон шинэ зүйлтэй зохицох хэрэгтэй болдог. Гэрийн ажил хийх, хүүхдийн даавуу угаах, хоол цай бэлдэхээс гадна эхнэртээ хүүхдээ хөхүүлэхэд нь туслах, хүүхдээ асрах, халамжлахад суралцах хэрэгтэй. -Төрсний дараа аав таны халамж эх үр хоёрт юунаас илүү чухал байдаг. Мөн энэ үед эх, нярай хүүхдийн биеийн байдал маш эмзэг байдаг учраас ямар нэгэн эмгэгт өртөхөд амархан. Эхнэр, хүүхдийн биед ямар нэгэн зовиур, шаналгаа гарвал цаг алдалгүй яаралтай эмчид үзүүлэх хэрэгтэй. Төрсний дараа эхнэр тань хүүхдийн даавуу угааж болохгүй шүү дээ. Хүйтэн усанд гараа ч дүрж болохгүй. Төрсний дараах гам сайн бариагүйгээс болж хожим нь эмэгтэй хүний гар болон үе мөч өвдөх болон хууч өвчтэй болдог. Тиймээс эхнэртээ анхаарал сайн тавиарай. Ажил амжихгүй байна гэсэн шалтгаар түүнийг хайхрахгүй орхиж болохгүй. Зарим эрчүүд хайнга хөндий байдлаасаа болж эхнэрээ хайхрахгүй орхидог. Ямартай ч тэр хүн таны хүүхдийг төрүүлсэн гэдгийг санаарай. Ингээд хорвоод шинээр мэндлэх үрээ хүлээж байгаа аав нартаа амжилт хүсье.